INTERNATIONAL AFFAIRS 世事政情
  • 立會透視鏡馬天娜 加入最愛專欄
  • 畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

建制未敢死攬鄭若驊 2018-01-12收藏文章
  • 我要回應

  鄭若驊風波,稱得上係「唐宮風暴」第二集。不過同電視劇一樣,第一集永遠都係最好睇,有咗第一集嘅「驚喜」,縱然第二集一樣係高潮迭起,但始終都係無咗新鮮感。相信唔少人同Tina第一個感覺都係,「吓,衰僭建?唔係呀嘛!」

 

  今次事件,最令Tina驚訝嘅唔係作為資深大狀兼工程師嘅鄭若驊間屋有僭建(何君堯話齋,邊個未買過僭建樓),而係成件事喺林鄭月娥眼底下發生。林鄭一向係精明幹練、香港精英一代嘅代表之一,做所有嘢都滴水不漏,睇佢連香港樓都唔敢買就見到。相信林鄭真係誓估唔到,委任一位成身公職嘅專業人士,都會畀人有把柄,實在始料不及。

 

  成個特區政府,第一難搵人做嘅係邊個位?特首當然唔係答案,因為特首呢個位,一年365日都有人喺度謀住同部署要做到,大把人等住上。最難搵到合適人選嘅,必然係律政司司長。呢個位,既要同北大人有交往,能夠將北大人嘅指示做好,同時間又要得到市民有正面感、要畀到人有大公無私嘅感覺,最最最緊要嘅係,上任得嘅,肯定係行內身家地位有返咁上下嘅律師,要佢地肯放棄高薪厚祿加入政府,再加埋之前列出嘅條件,肯定係難上加難。

 

  唔睇今次僭建事件,鄭若驊的確係一個幾合適嘅人選。法律背景就唔使多講,最緊要係,佢過往無乜就本地政治議題表過態,呢個係坐上律政司司長位置我認為比較重要嘅一環,因為市民可以期望佢能夠較公正咁去處理爭拗。但今次僭建事件不但令市民對佢誠信有質疑,傳媒不斷爆唔同料,更加令佢陷入會唔會成為「被告」嘅一個重大危機。但正如上述所講,呢個位搵人真係好難,林鄭難得相中鄭若驊,而佢又肯入廚房,所以一定係撐到底。

 

  至於建制派,好多都唔敢跟車太貼,謝偉俊更加公開話「好難撐」。Tina收到建制派報料,西環至今都未對事件下達任何指示,建制派估計可能鄭若驊係林鄭力撐嘅人才,而唔係北京欽點嘅自己人,所以未去到出手救亡嘅地步。建制派依家嘅立場好簡單,對鄭若驊一定唔會落井下石,但總動員死攬力撐,暫時就做唔出喇。

 

我要回應
  • 作者/專欄搜尋
  • 文章搜尋
  • 生活副刊
  • DIVA
  • 健康好人生
產品簡介

【得獎名單】【etnet New Year Bonus賞你】AIA友邦歐陸嘉年華2017/2018

【DIVA Channel】賞睇《死無對證》

【etnet Bonus賞你】 The ONE‧Pochacco丁財兩汪利是封