INTERNATIONAL AFFAIRS 世事政情
  • 立會透視鏡馬天娜 加入最愛專欄
  • 畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

建制派瞓醒未? 2018-08-10收藏文章
  • 我要回應

  作為香港運輸系統嘅「旗艦」,港鐵(00066)呢個星期承住公布業績可謂「威」到盡,雄霸晒各大媒體嘅版面、Airtime。醜聞一單接一單,炸彈一個大過一個,真係對時事極度冷感嘅市民,瞓著都畀轟轟地鐵聲嚇醒。

 

  醒嘅仲有一班尊貴嘅建制派議員。當日率先爆出沙中線月台剪鋼筋事件後,泛民已經喺立法會提出以特權法喺立法會調查事件,但當時建制派一片保駕護航嘅聲音,發言時縱然對港鐵、對承辦商都狠狠鞭撻,去到投票一刻,仍然係乖乖按著個反對按鈕。

 

  其後建制之一嘅田北辰亦都按奈不住要出手,另外再就港鐵沙中線會展站同土瓜灣站工程質量問題,提出用特權法調查。Tina最記得工聯會黃國健發言反對時就話,用權力及特權法係要牽涉到「重大公眾安全」,而田提出嘅,只係工程上問題,但同重大嘅公眾安全有一段好大距離。呢番咁有見地嘅說話,唔單止係「永遠企喺工人嘅對面」,更加係企喺全港公眾嘅對面。

 

  好喇好喇,周中政府先行爆大鑊話按圖則少咗2000粒螺絲頭,連政府都話信唔過港鐵,其後港鐵主席馬時亨亦話好負責任咁請辭兩次但最終都係留低,只係幾位高層有啲就提早退休、有啲就辭職,咁大件事去到依家,竟然都無一個人可以出來講返句:「對唔住,係我嘅錯,鑊等我去孭!」

 

  去到呢一步,之前暗地發力護航嘅建制派開始頂唔住壓力,見到記者發表意見嘅就再大力咁砌港鐵,見唔到嘅都喺Facebook出片出相Post出一副「為民請命」相。最好笑嘅係蔣麗芸議員,由當日話沉降係好小事,去到日前話震驚,畀記者問要唔要特權法查時終於都話乜都不排除。我們一班尊貴嘅議員,瞓醒喇!

 

  仲有人係未醒,呢個就係特區政府。過往多年孕育咗咁多「霸權」存活喺香港,開始承受惡果,最大問題係,去到咁嚴重嘅事故,竟然可以話自己都係被瞞騙嘅受害者,亦至今都無人需要負責。政府對呢班「霸權」嘅責任就係監管好佢地,唔可以被佢地瞞騙咩?過到海就係神仙、過唔到海又唔關佢地事,咁公務員、高官出糧係做乜嘅呢?醒下啦喂!

 

全新【etnet健康】專頁登場喇!立即成為Fans獲得最貼身實用嘅健康資訊! http://fb.me/health.etnet.com.hk
我要回應
  • 生活副刊
  • DIVA
  • 健康好人生
產品簡介

DIVA x HoPE 賞你 比利時100%有機香薰油套裝

【etnet Bonus賞你】黃金海岸商場 X B.Duck 萌爆行李帶和行李牌

【etnet Bonus賞你】PopWalk X emoji™ Summer Adventure 暑期大歷險 - emoji™鬼馬表情沙灘巾