INTERNATIONAL AFFAIRS 世事政情
  • 言歸政傳Jenny Yin 加入最愛專欄
  • 於傳媒行業打滾多年,其實亦是打雜多年,八卦天性難改,日常穿梭立法會及政總之間,閒時金鐘中環high tea、購物,順道收集情報。

民主派周日就初選 人氣唔夠點樣算? 2018-01-12收藏文章
  • 我要回應

  星期日(14日)就係民主派初選嘅日子,Jenny見到各位參選人呢排都有唔少嘢搞,蒲個頭、爭取吓選民支持咁噃!各施各法就係為咗喺最後直路拉票爭人氣。

 

 

上:新界東參選人(左起:范國威、郭永健、張秀賢)都叫有得爭下。

下:九龍西參選人(左起:袁海文、姚松炎、馮檢基)結果似乎已經好明顯。

 

咖哩飯玩軟銷 早就「畫公仔畫出腸」

 

  不過Jenny都係嗰句,就算民主派今個星期做完初選,其實都已經遲過建制派嘅宣傳多多聲㗎啦!唔知參選人之一嘅新民主同盟范國威(咖哩飯)係唔係同Jenny 嘅諗法一樣,所以都等唔切初選舉行,就已經學建制派嘅鄧家彪(阿Bill)同鄭泳舜(Vincent)咁,喺各條小巴線,甚至地鐵沿線掛起佢個嘜頭Banner,呢排仲係日日喺街站畫年畫,睇嚟佢想入返議會嘅心聲,就真係「畫公仔畫出腸」喎!

 

細孖昅實鄭若驊

 

  咖哩飯用軟性推銷,佢嘅對手、工黨郭永健(細孖)都唔執輸,不過係做咗啲正經嘢先!事關當Jenny同行家們噚日喺立會捕住鄭若驊司長嘅時候,細孖就率先走咗去警察總部,報案指鄭若驊喺僭建事件上涉嫌作出虛假陳述,而咖哩飯都係今日先同佢啲黨友去報案,慢咗半日。呢局睇嚟,細孖稍勝!

 

張秀賢初選前遇襲

 

  而另一個新東參選人張秀賢就冇搞咩新意思,反而係被人搞噃!事關佢今個星期一(8日)下晝收到一封刀片信,信入面仲有佢去調查海麗邨清潔工工潮嘅報道。跟住佢當晚就喺大圍遇襲,不過佢就唔肯定遇襲係同嗰封刀片信,抑或係參加初選有關喇!

 

姚松炎獲「男神」加持

 

  鏡頭一轉嚟到九西,Jenny知道作為九西大熱嘅姚松炎教授竟然搵咗《選戰》男神王宗堯拍片,呼籲大家星期日記得出嚟投票,如果唔係初選結果出咗嚟,點知自己個心水候選人冇份,咁就喊都冇謂喇……

 

基哥Chok爆自命「政壇李克勤」

 

  姚教授識拍片,民協馮檢基(基哥)都一樣識㗎!不過「男神」就冇喇,「政壇李克勤」你又啱唔啱?利申!唔係Jenny講嘅,係基哥自稱㗎咋!事關日前有人就話李克勤係「樂壇馮檢基」,點知噚日基哥就出咗條片,Chok晒咁話自己係「政壇李克勤」,仲話自己同李克勤有好多共同點喎……結果啲「嬲嬲」一發不可收拾。

 

  即係咁,基哥,你有冇問過李克勤先?再者,邏輯上其實大家都知道「阿媽係女人」,不過就唔係逢女人都係阿媽囉……

 

定係「方國珊The Second」?

 

  唔知係唔係驚條片唔夠姚教授Fight,基哥仲喺條片度講明,今次係佢最後一次參選噃!不過呢句說話係咪似曾相識呢?冇錯,皆因呢句說話,係前年嘅方國珊都講過㗎!結果佢咪又係走出嚟選!計Jenny話「姣婆守唔到寡」呢回事,大家早就見怪不怪喇。或者基哥其實唔係「政壇李克勤」,係「方國珊The Second」?

 

Who is 袁海文?

 

  正當兩位「片」來「片」去之際,另一九西參選人袁海文仲係致力於佢嘅美容「事業」,可以話「和理非」到一個點……Jenny見到佢Facebook除咗叫人去投票之外,對上一個Post都仲係講緊美容業。不過Jenny收到風,原來佢之前同有「美魔女」之稱嘅羅霖合照,諗住提升吓知名度,不過聽講羅霖就因為呢張相「受壓」,袁海文唯有Del咗張相,所以Facebook入面都冇乜特別有睇頭嘅Post嚕!Jenny就真係唔知淨返咁少時間,文仔究竟仲有冇招數可以谷吓人氣呢?如果冇就真係Game Over。

 

全新【etnet健康】專頁登場喇!立即成為Fans獲得最貼身實用嘅健康資訊! http://fb.me/health.etnet.com.hk
我要回應
  • 生活副刊
  • DIVA
  • 健康好人生
產品簡介

【etnet Bonus賞你】只野仁水墨畫冊《政‧漫》(親筆簽名版)

【立即參加】etnet.com.hk Facebook 讀者調查

【DIVA Channel】賞 Kiss Me Heroine Make持久防水濃密調控睫毛液