MANAGEMENT 管理
  • 玄來更精彩黃美雲 加入最愛專欄 [本欄逢周四更新]
  • 黃美雲小姐(Ms. Amy Wong)有豐富公關廣告經驗,現為廣告公司合夥人,亦是Media Training及溝通技巧的培訓專才。

    黃小姐研究玄學多年,並根據其豐富的商場經驗,融會形象包裝、掌相學、望診學、身體語言、溝通技巧、談判策略、危機管理等學問,編創了「極速性格解碼學」課程,為行政人員提供另類管理智慧。她先後為渣打銀行、香港中華煤氣有限公司、賽馬會等主持培訓課程。

    曾以黃愛媚的筆名,在報章雜誌撰寫專欄,出版的書包括《公關十八般武藝》。

從食垃圾到坐擁千萬的相 2017-03-16收藏文章
  • 我要回應

  藏龍伏虎。

 

  從後面睇都覺得有霸氣。

 

  霸氣的士司機見我好傾,坦言嚴格揀客。

 

  「我揸咗廿年的士,三唔載:樣衰唔載、截車姿勢唔正確唔載、玩眼神唔載!」

 

  我暗中滴汗,幸好通過其樣貌測試,否則仍然企緊喺十字街頭。

 

 

  「截車姿勢點樣算唔達標呢?」我問。

 

  「有D人懶有型,遞咗一次手就算數,又或者柔軟無力,好似同空氣溝通咁。我一於飛佢。」

 

  「D人又點玩眼神呢?」

 

  「嘿!有D人企圖用眼神截車。」

 

  「咁都得?大家距離咁遠。有時車頭玻璃又反光,大家點睇對方眼神呢?」

 

  「有D西裝友,喺女朋友面前扮Cool,以為瞄一瞄你,你就自動停低。」

 

  我坐喺車後觀察覺得佢個頭大,頭骨唔錯(即係唔凹、唔扁、唔歪),應該係有腦之人,照計有創富能力喎。不過耳仔偏細,究竟佢有乜故事呢?

 

  「你頭骨都幾靚,搵錢應該有D辦法喎,你係咪Hea呢?」我一於用激將法。

 

  「梗係唔係啦。我好捱得㗎!你信唔信吖,搵過垃圾食,成盒干炒牛河,擦哂!」

 

  「點解攪成咁嘅?」

 

  「我離家出走囉!因為阿媽逼我去補習,補習先生除淨我底褲打我,我讀書唔掂,半年冇番學,跟住失咗蹤,露宿街頭,執垃圾食。我出走時對阿媽講:撈唔掂我唔會番去見佢。」

 

  「結果呢?」

 

  「十九歲揸的士,廿七歲買的士,現在有三架。我同老婆講:如果我走咗,你就自己要一架、一架畀我家姐、另一架你自己處理啦。我老姐十幾年前借咗一萬蚊畀我買車,從來冇催過我還錢,十年後我十倍奉還。我仲同老婆講:記得畀架的士老姐呀,無謂我夜晚黑番嚟搵你吖!」

 

  嘿!都幾有蹺。難怪!頭骨立體,有諗頭,可惜耳細而兜,傾向反叛衝動,致令自己捱苦。頭大耳小,就算從後面睇,都知係辛苦創業型啦,不過頭大始終有著數,佢至少都幾千萬身家啦!

 

我要回應
  • C
  • D
  • D
產品簡介

【DIVA品味派】賞睇《無名屍詛咒》優先場

【etnet Bonus賞你】新書《大樹無形》小和尚和禪師的故事

【etnet Bonus賞你】皇室堡 x 妖怪手錶噗尼噗尼‧「文房喵寶」及「地縛喵遮遮貢」雨傘